ASTURIESpolaRENTABÁSICA

La RB no es ecléctica. O es un instrumento de transformación social, o lo es de integración en el sistema.

¡Entaína, güei entama la esperanza!

Viabilidá social y económica n’Asturies de la propuesta de Renta Básica de les iguales *

La normalidá nueva que vamos carecer nos prósimos meses va xenerar una estrocena dramática nes condiciones de vida n’Asturies. Lo mesmo que na crisis anterior y ante lo nidio d’una nueva llaceria económica, aquellos que camentaban tar salvaos volverán cayer nel abismu emocional que supón encariar la inseguranza vital duradera na que ya tamos asitiaos el 25% de la población asturiana. Nes llúcides pallabres de les collacies de Coordinación Baladre: “Bienllegaes al colapsu, agora somos más”. Pero magar too ello nun vamos cayer na resignación. Vamos preparanos pa transitar per caleyes nueves, con una sola certidume: xuntes caleyamos más lloñe. Vamos tener que valtiar torgues imposibles y avanzar reconstruyendo les pontes frayaes pol desánimu. Nun vamos dexar que los cantares de la serena del nuevu capitalismu ( inclusivu, verde, dixital…) mos desnortien. Afananos na construcción d’un modelu social y económicu alternativu desíxenos anoxar el reformismu ermu y les sos polítiques de ruindá ( formación pa la empleabilidá, ingresu mínimu vital…). Hai qu’entainar, güei entama la esperanza.


N’abondes ocasiones los coleutivos y organizaciones implicaes nes estremaes dinámiques de llucha social amenorgamos el nuesu marcu de pensamientu a una esbilla de idegues y práutiques qu’heredamos. Les propuestes que custionen esi marcu percíbense davezu con rocea, calificándoles peyorativamente como utópiques. Escaecemos (en parte pol ataque permanente a la nuesa memoria coleutiva) que la cadarma de derechos sociales so la que vivimos nesti momentu y que nomamos como Estáu del Bienestar representa la construcción real d’idegues y pruyimientos que n’otra dómina de la historia foren refugaes por considerales imposibles de realizar. Dende la xornada llaboral d’ocho hores fasta’l drechu a una pensión de xubilación.

Anguaño vivimos nuna crisis ente les dinámiques de reproducción del capital que consienten l’acumulación de riqueza de delles élites económiques y los procesos necesarios pa la reproducción de la vida del conxuntu de la población. Pa face-y frente a esta realidá debiéremos facer l’apueste por propuestes tresformadores que mos dexen asitiar la llucha por una vida digna y les condiciones afayaices pa caltenela nel centru de les nueses práutique polítiques. Nesti sentíu, la espublización fecha pola Asamblea Asturiana poles Rentes Básiques “Valtar imposibles, construyir utopíes. Estudiu de viabilidá de la Renta Básica de les iguales n’Asturies”, ye una convidada a caleyar xuntes per un camín nuevu y reflexonar en comuña sobro aquello qu’albidramos utópico y llonxano.

Renta Básica en movimientu

La llectura crítica y anticapitalista del drechu a la Renta Básica, tien un percorríu llargo n’Asturies, rellacionau dafechu cola llucha social de dellos coleutivos nos caberos años. Esclariamos que cuando falamos de Renta Básica de les iguales facemos referencia al drechu que tien cada persona pol fechu de nacer, a percibir de mou periódico una cantidá económica suficiente (asemeyada al estragal de probitú y la mesma cuantía pa toles persones), que-y permita cubrir les sos necesidaes materiales básiques. Ye un drechu individual (non familiar); universal (non contributivo y pa toles persones); incondicional (dixebrao del nivel d’ingresos y del mercau de trabayu). Con una parte d’esti ingresu económico crearíase un Fondu Común de Renta Básica, empobináu a financiar necesidaes coleutivas (educación, salú, infraestructuras, transporte, servicios o equipamientos pa coleutivos especiales, etc); y taría xestionau dende la comunidá, per aciu de procesos de participación coleutiva.

P’afrontar el trabayu d’evaluar la viabilidá d’esta propuesta, dende l’asamblea apostamos por desendolcar un estudiu atalantáu como una xera coleutiva (superando les llendes que tienen les ellaboraciónes intelectuales individuales, o de mou estricto téuniques o académiques) que mos dexare afondar sobre dos aspeutos que xeneraben un esmolecimientu constante nos múltiples alderiques celebraos sobre’l tema a lo llargo d’estos años. Per un llau, les consecuencies sociales del entamu d’esti drechu, y per otru, les condiciones económiques afayaices pa facilitar la so implementación nun territoriu como Asturies.

Viabilidá social: camudar el nuesu imaxinariu

L’análisis de la perceición social d’esti nuevu drechu fízose mediante la realización d’estremaos grupos de discutiniu y entrevistes, que mos permitieron ellaborar un diágnósticu compartíu de la situación social y económica d’Asturies. En xeneral percibíase con pesimismu la realidá economica d’anguaño, con referencies de mou constante a la falta d’espectatives llaborales, la precariedá dientro del mercáu de trabayu y la inseguranza vital ensin fin. Parte d’esta congoxa vese aliviao pola solidaridá interxeneracional y familiar, que pue desendolcase gracies al gabitu material que dan entovía (anque ca vegada en menor medida) les pensiones de xubilación venceyaes a dellos seutores industriales. Ensin esperanza nel futuru, la emigración conviértese nuna opción prioritaria pa la xente más moza que val p’acelerar la perda y l’avieyamientu progresivu de la población.

Enfrentando esti marcu, la propuesta de Renta Básica de les iguales percibíase como una llave qu’abriría múltiples posibilidaes n’estremaos niveles. Nel ámbitu individual, foron abondes les referencies a los sos beneficios pa meyorar la salú mental de les persones, amenorgando l’ansiedá y la inseguranza personal, sobremanera nel momentu d’enfrentase al mercau llaboral. Esto pudiere xenerar consecuencies tamién sobro’l contextu social, faciendo más cenciello desendolcar iniciatives económiques coleutivas que contribuyeren a pone-y frenu a la dinámica d’emigración llaboral y dando-y puxu a la xera de construyir una alternativa económica y social al modelu capitalista que carecemos.

Viabilidá economica: repartir la nuesa riqueza

Col envís de superar les duldes que davezu xenera la existencia de recursos financieros abondos pa facer económicamente vidable esti drechu pa toa la población asturiana, la propuesta que facemos nesti estudiu de viabilidá fai un apueste por desendolcar un procesu d’implementación a llargu plazu, al que nomamos Programa d’Implantación de la Renta Básica de les Iguales (2021-2040) y que taría encadarmáu n’estremaes fases. Na primera, nomada Fase d’Emerxencia Social (2021-2025) debiéremos destinar recursos económcos abondos pa garantizar esti drechu al seutor de población que tá nuna situación de probitú, exclusión social o vulnerabilidá social y económica, cuantificáu de mou aprosimao en 255.655 persones. Taríemos falando del 27,7% de la población asturiana, ente les que taríen les personas beneficiarias del Salariu Social Básicu, les desempleaes ensin cobertura, pensionistas con ingresos per baxo l’astragal de probitú, y aquelles trabayaores con baxos ingresos.

Desendolcar un procesu gradual d’estes característique mos permitiría face-y frente a los problemes sociales y económicos que foren apaeciendo, faciendo les modificaciones téuniques financieres p’asegurar la so implementación y les correcciones afayaices pa nun perder el carácter tresformador ni la voluntá anticapitalista del procesu.

Pa la ellaboración del marcu finacieru, entamamos amosando lo que la visión androcéntrica de la ciencia económica escuende. Les condiciones que permiten xenerar la riqueza nos territorios son posibles pol desendolcu d’un conxuntu de procesos onde participen la sabencia científica, la educación y salú de tola población trabayaora, la teunoloxía ya infraestructures financiaes per aciu de los presupuestos públicos, y dende llueu’l trabayu de curiaos atapao fechu de mou mayoritario por muyeres. Ye una dinámica na que participamos toes les persones d’estremaes maneres a lo llargo de la nuesa vida. Poro, defendemos que los recursos económicos necesarios podríen atropase al traviés de una reasignación y reestructuración fondera del gastu públicu, xunto cola financiación al traviés del sistema fiscal pa incorporar nuevos recursos fiscales. Y atalantamos que nestos momentos n’Asturies existe abonda riqueza pa entamar la implementación de la primera Fase d’Emerxencia Social nomada enantes.

Renta Básica de les iguales y muncho más

Como complementu al análisis de viabilidá dibuxáu enantes tamién amestamos delles reflexones al rodiu esti drechu, ellaboraes dende estremaos ámbitos sociales. Incluyendo un conxuntu de datos históricos y económicos que mos valgan pa ver a les clares el tipu de sociedá na que vivimos y pescanciar les condiciones sociales coles qu’entamamos cuando construyimos propuestes alternatives nueves. Nun debiéremos escaecer que’l retu al que mos enfrentamos ye xenerar otru imaxinariu sobro’l nuesu poder como comunidá pa enxaretar acciones enfotaes a sofitar vides plenes y soberanes n’equilibriu cola natura.

Esperamos que’l procesu en comuña que compartimos nesta publicación “Valtar imposibles, construyir utopíes. Estudiu de viabilidá de la Renta Básica de les iguales n’Asturies” valga non solo pa siguir arriqueciendo l’alderique alredor la propuesta de Renta Básica de les iguales, sinon pa xenerar les condiciones que mos dexen valtiar los imposibles que ponen torgues a la nuesa acción coleutiva y allanar la xera de construyir n’andecha la utopía d’una Asturies alternativa que seya’l reflexu d’una sociedá nueva nun mundiu nuevu.

Pa que lo imposible puea facese realidá primero hai qu’atrevese a imaxinalo, a nomalo, a reflexonar como seríen les nueses vides dende eses coordenaes. Esti testu ye una convidada a facelo: ¿entamamos?

(1) Pa un conocimientu fonderu d’esta custión pue consultase el llibru Renta Básica de las iguales. De la centralidad del empleo, a la centralidad de la vida, asoleyáu por Cordinación Baladre.

* Pue alcontrase una versión en castellán d’esti testu na revista sindical Contracorriente editada pola Corriente Sindical d’Izquierdes [n.º50 / Abril del 2020]

Asamblea Asturiana poles Rentes Básiques (Xunu 2020)

asturiespolarentabasica@gmail.com

https://asturiespolarentabasica.wordpress.com/

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s

Información

Esta entrada fue publicada el junio 19, 2020 por en Uncategorized.

Navegación

A %d blogueros les gusta esto: